08.12.2004

UB Fuktig med Crème Døla Krem

Kremen over alle kremer, Crème de la crème, har ved eit lokalt ordspel blitt til Crème Døla Krem. Den nystarta ungdomsbedrifta frå allmennfag på Hjerleid har nytta kjemitimane sine godt, og lanserer no ein hudkrem av høgste kvalitet. Medlemene av UB Fuktig, som bedrifta heiter, fortel med entusiasme at kremen er av eksepsjonelt god kvalitet.

UB Fuktig består av elevane Marit Svanborg, Martha Vorkinn, Petter Hoksvold og Håvard Nørstebø. Kjemilærar Lars Tressum er katalysatoren til bedrifta, og som ØKI-lærar har han vel ein del gode råd å gi når det gjeld sjølve forretningsdrifta også.

I motsetnad til rynke- og fuktigheitskremer frå nokre av dei etablerte verdskonserna, blir Crème Døla Krem lansert som det naturproduktet det er - utan luriumfantastiske eventyrnamn på dei ulike ingrediansene. Berre naturlege råvarer blir nytta til framstillinga.

Fleire av lærarane har vore prøvekaninar på produktet i innkjøringsfasen, og rapportane seier at fuktigheitskremen er sers god. Tørre kritfingrar blir som nye etter ein omgang med kremen.

Kremen skal no ut på marknaden, og Nytt frå Hjerleid  kjem tilbake med oppdateringar om elevbedrifta så snart det er noko å melde.

Dersom du har lyst til å kjøpe produktet, er det berre å ta kontakt med medlemmene i bedrifta. Dei produserer på spreng, etter kvart som ordrane kjem inn.

◄Til arkivet