25.02.2006

Miljøtime og starten på vinterferieveka 24.02.2006

Då avdelingsleiar Solveig ønskte velkommen til felles varm sjokolade og sveler i kantina på Hjerleid, fredag den 24. februar, var det starten på ei velsmakande, informativ og interessant økt rett før vinterferien.

Solveig hadde mest ikkje snakka ferdig, så sto serveringspersonalet klar med sjokoladen og svelene (bildet til venstre over). På bildet til høgre ser vi ein forventningsfull  elevflokk i samtale med lærar Ove.

Etter maten gjekk vi inn i daglegstua, og til den informative delen av programmet. Frå avdeling Otta kom mellomleiar Ingrid Vorkinn saman med elevane Christina S. Holen og Andreas Bagås Lien. Ingrid fortalde litt om Entreprenørskap i skolen. Satsing på ungdomsbedrifter i skolen har førd til at avdeling Otta i år har 10 ungdomsbedrifter, som driv med alt frå vaktmeisterteneste i Vågå, via barnevakt, lage rattkjelke, konsertarrangement og til å lage websider for bedrifter. 7. mars tar elevbedriftene på Otta del i den såkalla Cambridgeeksamenen, ein eksamen på engelsk for alle ungdomsbedrifter i Europa.

Etterpå fortalde elevane Christina og Andreas om den ungdomsbedrifta dei kom som representantar frå: Candyshop UB. Produktet deira er heimelaga godteri, t.d. drops og karamellar. Skolekjøkkenet blir brukt ein time om måndagane til produksjonslokale. Elevane har lært mykje om å sette opp budsjett, reknskap, samarbeid med andre, samt praktisk salsarbeid og kundekontakt. Målet er eit overskot på kr. 16.500,-. Sjølvsagt skal Candyshop UB delta på Innlandsmessa på Hamar, torsdag den 9. mars, der dei håpar å gjere det godt.

Ein kraftig tankevekkar fekk vi servert i form av filmopptak frå eit HMS-prosjekt (Helse, Miljø og Sikkerheit) som dei yrkesfaglege elevane på heile Nord-Gudbrandsdal vidaregåande skule hadde arbeidd med. Brann i bil og brannslokking, kollisjonsbenk med opptil 15 km/t og Veltepetter var nokre av det elevane skulle prøve seg på. Dersom det framleis finst elevar som køyrer for fort og utan bilbelte etter å ha gått gjennom dette opplegget, kan dei ikkje ha følgt godt nok med i timen.

Til sist var det medieelevane frå 1. klasse allmenfag som viste eit par korte reklamesnuttar dei hadde laga.

God vinterferie!

◄Til arkivet