09.09.2003

Statsministeren besøker Hjerleid

Tysdag 9. september 2003 fekk Hjerleid vidaregåande skole besøk av statsminister Kjell Magne Bondevik, saman med Gunnar Husan og Siv Nordrum frå statsministerens kontor.

Det var lokalavdelingane av Kristelig Folkeparti i Dovre og Lesja som skulle ha møte med statsministeren. Mellom anna skulle dei drøfte situasjonen for Hjerleid. Etter som hovudtema var Hjerleid, var det naturleg at skolen også tok på seg oppgåva med å arrangere møtet.

Rektor Jan Harald Syrstad , assisterande fylkesrådmann Oddbjørn Snøfugl, Jon Sneve frå Jora Bygg og Laft AS, Dag Lindvig frå Norsk Kulturarv og Steinar Moldal frå Senter for bygdekultur heldt innleiingsforedrag om ulike sider ved utdanninga på Hjerleid. Særleg hadde ein fokus på treskjerarutdanninga som no står i fare for å leggast ned, og kva dette vil få å seie for arbeidet med å restaurere mange av dei kulturskattane Noreg har. Ein peikte også på behovet for å opprette eit nasjonalt trearbeidssenter ved skolen. Eit senter der ein på nytt kan få ei restaurering og rehabiliteringsline. Mange trebyggverk blir i dag øydelagt, ikkje berre av slitasje, men like mykje av at dei som skal sette dei i stand, ikkje er kvalifiserte til å gjere arbeidet.

Statsministeren var vel nøgd med orienteringane, og uttrykte klart at det var behov for å halde fram med treskjerarutdanning og å opprette eit trearbeidssenter. Samtidig ga han ingen lovnader om at staten kunne hjelpe til med finansieringa - men han sa heller ikkje det motsette! Likevel peikte han på dei regionutviklingsmidlane som staten kanaliserer ut til regionane gjennom fylka...

JHS

◄Til arkivet