09

09.04.2005

Venn1 - kurs i psykisk helse

Fleire rapportar dei siste åra syner at psykiske problem blant skoleungdom aukar i omfang. Dette kjem fram i form av m. a. skulking, sjølvskading og i verste fall sjølvmord.

Oppland fylke er eit av tre satsingsfylker for Psykisk helse i skolen, og Hjerleid har no som ein av dei første skolane gjennomført den obligatoriske delen av dette undervisningsopplegget.

Kursleiar Bjørn, og Mahesh i bakgrunnen

Venn1.no består av tre element:
- Basispakken
- Firkløver
- A til Å-pakke (prosjekt)

Basispakken er grunnleggande, og alle elevar skal gjennom denne. Hjerleid hadde besøk av prosessleiaren Bjørn Smith-Hald, Roy - eit tidlegare mobbeoffer, og Mahesh Kumar frå India som var observatør under kurset.

Bjørn var inspirerande og drivande flink til å få elevane med på dei ulike gruppeoppgåvene, som det var mange av. Elevane deltok ivrig, og hadde sers gode løysingar på problem-stillingane.

Seier ein elev at han skal ta livet sitt - ta kontakt med helsesøster eller ein lærar du stoler på. Du har ikkje teieplikt i dette høvet, det er altfor mykje å bære på for ein medelev.

Roy, som vi ser til høgre, var heilt klar på at det ikkje er illojalt av ein venn å gå til helsepersonell/lærar med slike opplysningar. Teieplikt gjeld ikkje her, det viktigaste er å hjelpe vennen din, men du skal sjølvsagt ikkje skvaldre til alle du snakkar med!

Roy fortalde om sin heilt normale oppvekst i ein familie, og om kor han gledde seg til å begynne på skolen. Men då han vart hakkekylling og mobbeoffer i fleire år, hjelpte det heller ikkje å skifte skole, eller komme i vidaregåande skole. Problema følgde med på lasset. Til sist var det så ille at han fleire gonger prøvde å ta sitt eige liv. Heldigvis fekk han til sist hjelp, og greide ved sterk innsats å legge ting bak seg og sjå framover.

Elevane vart raskt sette saman i grupper, først i toer-grupper, seinare i firer-grupper. Der fekk dei fleire spørsmål å ta stilling til, spørsmål som heile tida dreide seg om psykisk helse; t. d.:
- kva bør skolen/lærarane gjere for elevar som slit mentalt?
- kva gjer du/gjer du ikkje som venn, dersom ein annan slit (mobbing, sjølvmord)?

På desse spørsmåla, og på fleire andre, hadde elevane sers gode og gjennomtenkte svar. Dersom alle tar konsekvensen av dei svara dei gav på spørsmåla frå Bjørn, er mobbing ikkje noko problem på Hjerleid.

Det er stor semje om at eit slikt kurs bør ein ha for nye elevar ved kvar skolestart om hausten.

◄Til arkivet